(က)
“တုံးတုံ...တုံးတုံ..."
(ခ)
ချစ်စဖွယ်အသံလေးပေးရင်း တောမြို့တစ်မြို့ရဲ့ လော်ကယ်ရထားဟာ
သူ့ရင်ဘတ်ကို ဆွဲဟလိုက်တယ်။ ကာမစ္ဆန္ဒတောအုပ်များ၊ စိမ်းလန်းတဲ့
နာနာဘာဝများ ဟိုး ..အဝေးမှာ နေခဲ့ပြီ။ ခုနှစ်ပြည်ထောင်ကို
သိမ်းပိုက်မယ့် ခဲလက်ဆီဘုရင်မရဲ့ နဂါးသုံးကောင်လို
ရထားနောက်တွဲဟာ အမြီးတယမ်းယမ်း..။
(ဂ)
ရှာဖွေဖို့လွယ်သလောက် ရှာတွေ့ဖို့ခက်တဲ့ စိတ်။ တစ်ချို့က
ဆင်းသွားတယ်။ တစ်ချို့က တက်လာနေတုန်း။တဟူးဟူးတိုက်ခတ်နေတဲ့
ရထားတစ်စင်းရဲ့ မြန်နှုန်းကို လူ့စိတ်က ဦးဆောင်ခုတ်မောင်းလို့။
ယနေ့ကမ္ဘာကြီးဟာ တစ်ယောက်အနား တစ်ယောက်ရှိရင်း တစ်ယောက်ကို
တစ်ယောက် ခြားနားပစ်လိုက်ပြီ။ ဒါ ဘယ်သူငြင်းမတုန်း..။
(ဃ)
ကိုယ့်တရားကို ကိုယ်ပြန်နာတယ်ဆိုတာ တကယ်တော့
ကိုယ့်တရားကိုယ်စီရင်ခြင်းပါပဲ။ အတွေးမဆုံးခင်မှာပဲ
နားကြပ်ကိုကယောင်ကတမ်းကောက်တပ်လိုက်မိတယ်။ ဗျာပါဒ
နွေရက်ခင်းများဖြတ်ကျော်လာပြီးနောက်ပိုင်းဝေနေယျပုံပြင်တွေ
ဟာ ပိုပူလာသလိုလို။ တကယ်ဆိုရင် ပင်လယ်ကို မျှားဖို့ ကြယ်တွေအပေါ်
ရိုးသားခဲ့သင့်တာ။ အိပ်မက်အကြမ်း ကြီးနဲ့ နိဝါနစခန်းကို
မလှမ်းရဲတဲ့ သူ့ဖြစ်အင်ဟာ ပတ်ကြမ်းတိုက်။
(င)
ဦးတည်ချက်မရှိ၊ အဖော်မပါ ၊စိတ်ဗလာသက်သက်နဲ့ ရွေ့ရတာ
ကြောင်စီစီနိုင်သလောက် ပေါ့ပါးတယ်။ မှတ်စိတ်ထဲ အသံတစ်သံ
ဝင်လာပြန်ပြီ ။ တုံးတုံ…တုံးတုံ..။ လူသူအသွားအလာနည်းတဲ့
ဝိဝေကဘူတာလေး။ ခပ်လှမ်းလှမ်းမှာ စိမ်းစိုစို
တောအုပ်လေးတစ်ခု၊ ဒါတော့ ကာမစ္ဆန္ဒတောအုပ်မဖြစ်နိုင်။
တောင်တန်းတွေက သမာပတ်ဝင်စားနေတဲ့ ပုဂ္ဂိုလ်ကြီးတွေ ပမာ။
ဘုရားအဆူဆူချီးမွမ်းတဲ့ နေရာဆိုတဲ့ အသိက ခြေလှမ်းတွေကို
မတားဆီးနိုင်တော့။
ရှင်မားရု
Posted by
ရွင္မားရု
Sunday, May 10, 2015
4 comments:
အတွေးအဖွဲ့တွေအားလုံးအတွက် ကြည်ညိုလေးစားဦးညွတ်ပါ၏ ဘုရား
“ဘုရားအဆူဆူချီးမွမ်းတဲ့ နေရာဆိုတဲ့ အသိက ခြေလှမ်းတွေကို မတားဆီးနိုင်တော့။”
ဖတ်ရတာ ငြိမ်းချမ်းလှပါ၏။
ပန်းချီကားတစ်ချပ်လိုပါဘဲ ဘုရား …
“တုံးတုံ...တုံးတုံ..."
အသံထွက် အက်ဆေး
သိမ်မွေ့နက်နဲလှပတဲ့စကားလုံးတွေရဲ့တန်ဘိုးတွေပေ့ါသွားမဆိုးလို့ မမန့်တော့ပါဘူးလို့တွေးရင်း …
မန့်လိုက်မိပြီဘုရား …။
Post a Comment